راگەیاندراوێک لە حکومەتی ھەرێمی کوردستانەوەئەو بارودۆخە گرژ و مەترسیدارەی ڕووبەڕووی عیراق و کوردستان بۆتەوە، ھەمووان ناچار دەکات لە ئاستی بەرپرسیاریەتیی مێژووییدا بین و ڕێگا نەدەین بارودۆخەکە زیاتر بەرەو شەڕ و پێکدادان بچێت لەنێوان ھێزە عیراقییەکان و پێشمەرگەدا.
پەلامار و بەریەککەوتنی ھێزەکانی عیراق و پێشمەرگە لە ١٦/١٠/٢٠١٧ـەوە تا ئەمڕۆ، زیانی بە ھەردوولا گەیاندووە، لەوانەشە ببێتە ھۆی خوێنڕشتنێکی بەردەوام و لە ئاکامیشدا تێکدانی ڕایەڵە و پەیوەندییە کۆمەڵایەتییەکانی نێوان پێکھاتەکانی عیراق.
بێگومان شەڕ لە نێوان ھەردوولادا نابێتە ھۆی سەرکەوتنی ھیچ لایەک، بەڵکوو لە ھەموو بوارەکانی ژیاندا وڵات بەرەو ھەڵدێری گشتی دەبات، بۆیە لە ڕوانگەی ھەستکردن بە بەرپرسیاریەتی بەرامبەر گەلی کوردستان و عیراق، پێشنیار بۆ حکوومەت و ڕای گشتیی عیراق و جیھان دەکەین:
١- ڕاگرتنی دەستبەجێی تەقەکردن و ھەموو جۆرە کردارێکی سەربازی لە ھەرێمی کوردستان.
٢- سڕکردنی ئاکامی ڕیفراندۆم کە لە کوردستانی عیراق ئەنجام درا.
٣- دەستپێکردنی دیالۆگی کراوە لە نێوان حکوومەتی ھەرێم و حکوومەتی فیدرال لە سەر بنەمای دەستووری عیراق.
حکوومەتی ھەرێمی کوردستان
٢٤/١٠/٢٠١٧
ليست هناك تعليقات:
إرسال تعليق
کۆمێنتەکەت لێرە بنووسە